Chelsea kutembelea Nigeria kwa mara ya kwanza mwezi Mei.

Klabu ya Chelsea itatembelea Nigeria kwa mara ya kwanza katika historia ya klabu mwezi Mei, wakati programu yao ya mashabiki, The Famous CFC, itakapofanya tukio lake la pili mwishoni mwa msimu wa 2025/26.

Nyota wa zamani wa Chelsea na Super Eagles, Victor Moses, ndiye atakayekuwa mwenyeji wa Chelsea Nchini humo na atakutana na mashabiki wa klabu katika hafla hiyo ndani ya jiji la Lagos.

Ziara hii ya Nigeria ni kituo cha tano msimu huu kwa programu hiyo ya kimataifa ya mashabiki, ambayo inalenga kuimarisha uhusiano kati ya mashabiki wa Chelsea duniani kote. Ikiwa imepanuliwa msimu huu kwa kuongeza miji zaidi ya wenyeji, hafla ya Lagos italeta familia ya Chelsea pamoja wakati msimu ukielekea ukingoni.

Victor Moses anajulikana sana kwa mashabiki wa Chelsea kwa kipindi chake klabuni humo, ambapo alishinda taji la ligi kuu la msimu wa 2016/17.

Baada ya kuiwakilisha kwa fahari Nigeria tangu alipoanza mwaka 2012, Moses alikuwa sehemu ya kikosi kilichoshinda AFCON 2013. Pia alishiriki katika mashindano ya Kombe la Dunia 2014 na Kombe la Dunia 2018 kabla ya kustaafu soka la kimataifa mwaka 2018.