Huna mpenzi? Jipigie makofi, wewe una furaha zaidi - Utafiti

Mtazamo wa muda mrefu wa kijamii kwamba ni lazima uwe kwenye mahusiano ya kimapenzi au ndoa ili uweze kupata furaha ya kweli, sasa umepingwa rasmi na sayansi. Utafiti mpya wa kisaikolojia umebaini kuwa watu wasio na wapenzi (ma-single) wana uwezo mkubwa wa kuishi maisha yenye amani, furaha, na mafanikio makubwa kuliko inavyofikiriwa.

Utafiti huo wa hivi karibuni uliochapishwa katika jarida mashuhuri la kisayansi la Personality and Social Psychology Bulletin, umebaini kuwa siri ya furaha kwa watu wasio na wapenzi haitokani na kutengwa, bali inategemea jinsi mtu anavyoichukulia hali yake ya useja.
 

Watafiti kutoka Chuo Kikuu cha Simon Fraser wamegundua dhana inayoitwa "Singlehood Self-Expansion" (Kujikuza Binafsi wakati wa Useja).

Watu wanaofanikiwa kuwa na furaha wakiwa peke yao ni wale wanaochukulia kipindi hicho kama fursa adhimu ya kujiendeleza kimaisha, kusoma, kujenga biashara, na kujifunza ujuzi mpya.

"Watu wanaotumia muda wao wa useja kujijenga wameripotiwa kuwa na viwango vya juu sana vya kuridhika na maisha, na hawana kabisa hofu ya kubaki peke yao," unaeleza utafiti huo.

Faida kuu tatu walizonazo watu wasio na wapenzi:

UHURU MKUBWA WA MAAMUZI:

Watu walio single wana uwezo mkubwa wa kujiongoza na kufanya maamuzi ya maisha bila shinikizo au uhitaji wa kuridhisha upande mwingine.

UKARIBU MKUBWA WA KIJAMII:

Tofauti na dhana kwamba ma-single wanajihisi wapweke, utafiti unaonyesha wana mitandao imara zaidi ya marafiki, ndugu, na wafanyakazi wenzao. Hupata usaidizi mkubwa wa kihisia kutoka kwa watu hawa kuliko walio kwenye mahusiano ambao mara nyingi hujitenga.

AFYA BORA YA AKILI:

Wataalamu wa saikolojia wanasisitiza kuwa peke yako ni salama zaidi kiakili kuliko kuwa kwenye mahusiano yenye migogoro. Takwimu zinaonyesha takribani 25% ya watu walio kwenye mahusiano bado wanajihisi wapweke sana.

Wataalamu wa afya ya akili wanashauri jamii kuacha kuwatazama watu wasio na wapenzi kama watu waliokosa bahati au wenye upungufu. Badala yake, useja unapaswa kutazamwa kama mfumo sahihi na mzuri wa maisha unaomruhusu mtu kuwa na amani ya ndani na kufikia malengo yake bila vikwazo vya kihisia.

Furaha ya kweli haitengenezwi na mtu mwingine, bali inaanza na jinsi unavyojithamini na kupanga maisha yako—iwe una mpenzi au hauna.