Majeraha yamtupa nje ya Kombe la Dunia beki wa Uingereza.

Beki wa Uingereza Tino Livramento, anaripotiwa kuwa nje ya Kombe la Dunia la 2026 baada ya kupata pigo kubwa la majeraha muda mfupi kabla ya mechi ya ufunguzi ya timu hiyo. 

Beki huyo wa pembeni wa Newcastle United FC anasumbuliwa na jeraha la misuli ya ndama (calf), jambo ambalo limemlazimisha kocha Thomas Tuchel kufanya mabadiliko ya dharura katika kikosi kabla ya pambano la Uingereza dhidi ya Croatia.

Kwa mujibu wa The Athletic, beki huyo mwenye umri wa miaka 23 atakosa mashindano yote baada ya kupata jeraha hilo la ndama. Tatizo hili linaongeza msururu wa misukosuko aliyokumbana nayo katika msimu wa 2025–26, ambapo alicheza mechi 17 pekee za Ligi Kuu ya Uingereza kutokana na majeraha mbalimbali.

Msimu wake uliathiriwa na majeraha mawili tofauti ya goti, kuchanika kwa misuli ya nyuma ya paja (hamstring) mwezi Januari kulikomfanya akose mechi 15, pamoja na jeraha la paja mwezi Aprili.

Ripoti hiyo pia inaeleza kuwa Uingereza itamuita mara moja Trevor Chalobah wa Chelsea FC kuchukua nafasi ya Livramento. Kanuni za FIFA zinaruhusu Shirikisho la Soka la Uingereza (FA) kusajili mchezaji mwingine wa uwanjani hadi saa 24 kabla ya mechi ya kwanza kuanza rasmi.

Livramento, ambaye alikuwa anathaminiwa sana kwa uwezo wake wa kucheza pande zote mbili za ulinzi, anatarajiwa kurejea Tyneside kuanza matibabu na programu ya kurejea uwanjani.