RUTO: Reli ya SGR ya Kenya sasa kutandikwa hadi Tanzania

Serikali ya Kenya imetangaza mpango mkakati wa kuunganisha miundombinu yake ya usafirishaji na nchi jirani ya Tanzania kwa kuipanua reli ya kisasa ya Standard Gauge Railway (SGR). Rais William Ruto ametangaza rasmi kuwa serikali yake imetenga kiasi cha Shilingi bilioni 5 za Kenya (KSh 5 Billion) kwa ajili ya kuanza utekelezaji wa mradi huo mkubwa wa kikanda.

Akizungumza wakati wa ibada ya kanisa iliyofanyika katika eneo la Mwatate, Kaunti ya Taita Taveta, Rais Ruto amebainisha kuwa upanuzi huo utaanzia mji wa Voi na kuelekea upande wa Tanzania ili kurahisisha usafirishaji wa abiria na mizigo.

"Tayari tunapanua SGR kutoka Naivasha kuelekea Kisumu na mpaka wa Malaba. Tunapoendelea na hilo, ni muhimu pia kuunganisha Voi na Tanzania, na tayari tumetenga takriban KSh bilioni 5 kwa ajili ya mradi huo," alisema Rais Ruto.

Mradi huo unatarajiwa kujumuisha ujenzi wa vituo vipya vya SGR katika maeneo ya Mwatate, Bura, Mwakitau, na Taveta kabla ya njia hiyo kuvuka mpaka na kuingia rasmi nchini Tanzania. Hatua hii inalenga kuimarisha kwa kiasi kikubwa biashara ya mipakani, kuongeza ufanisi wa usafirishaji wa mizigo, na kuchochea fursa mpya za kiuchumi katika ukanda wa Pwani na Afrika Mashariki kwa ujumla.

Uamuzi huu unakuja wakati ambapo nchi za Jumuiya ya Afrika Mashariki (EAC), zikiwemo Kenya, Tanzania, na Uganda, zikitia mkazo katika kuunganisha mitandao yao ya reli ili kupunguza gharama za usafirishaji kwa nchi wanachama.