Tibenda, Mlegelo waanza vizuri ANZA MMA Pro Night 3 Nairobi

Wapiganaji wawili kutoka Tanzania, Chris Tibenda na Rashid Mlegelo, walishinda mapambano yao huku wakiwakilisha Tanzania katika hafla ya ANZA MMA Pro Nights 3, iliyofanyika Jumamosi, tarehe 19 Septemba, kwenye eneo la paa la jengo la Village Market jijini Nairobi ambapo Kulikuwa na mapambano nane yaliyohusisha wapiganaji kumi na sita kutoka Kenya, Uganda, Tanzania, Angola, Madagascar na Sudan Kusini, na mapambano hayo yote nane yalihitimishwa ndani ya raundi ya kwanza.

Tibenda alimshinda Farouk Ogwal wa Uganda kwa kumlazimisha kusalimu amri (submission) ndani ya muda usiozidi dakika moja katika pambano la ufunguzi la usiku huo kwenye kitengo cha uzani wa 'flyweight'. 

Mlegelo alimshinda Kennedy Serunyange wa Uganda kwa njia ya TKO (kusimamishwa kwa pambano na mwamuzi) katika kitengo cha uzani wa 'featherweight'. Mlegelo sasa ameshinda katika matukio yote matatu ya ANZA MMA Pro Nights, akiwashinda Justin Okot na Jai ​​Chilufya kwa mbinu ya 'rear naked choke' katika matukio mawili ya awali.

Mwanzilishi wa ANZA MMA, Peng Chen, alitangaza kuwa shindano hilo litaanza kutoa mikanda rasmi ya ubingwa kuanzia tukio lake lijalo la kitaalamu mwezi Desemba. 

Akiwa na rekodi ya kutopoteza pambano lolote katika mashindano hayo, Mlegelo sasa anaonekana kuwa mgombea imara wa taji la uzani wa 'featherweight'.

ANZA MMA imekuwa jukwaa linalokua kwa ajili ya vipaji vya Afrika Mashariki na Kati, na Pro Nights 3 ilikuwa hafla yake kubwa zaidi ya mapambano ya kitaalamu hadi sasa. Wapiganaji wote wawili wanawashukuru makocha wao, wenzao wa mazoezi, familia zao na mashabiki wa Tanzania kwa uungaji mkono wao.