Ulaya yagawanyika Ukraine kutumia silaha zao kuipiga Urusi

Mawaziri wa ulinzi wa Umoja wa Ulaya waliokutana mjini Brussels walishindwa kufikia makubaliano kuhusu kama Ukraine inapaswa kuruhusiwa kutumia silaha wanazoipa, kuyapiga maeneo ndani ya Urusi. 

Nchi za Umoja wa Ulaya zilikuwa tayari zimekubali kwa pamoja kutoa msaada wa kijeshi kwa Ukraine. Lakini wakati baadhi ya wanachama wanatoa silaha kwa Kyiv zikiandamana na vikwazo kidogo, wengine wanafanya hivyo kwa masharti kuwa zitatumika ndani ya mipaka ya Ukraine. 

Lakini serikali ya Ukraine inasema wanajeshi wake wanahitaji kuyapiga maeneo ndani ya Urusi, kwa sababu Urusi inaanzisha mashambulizi kutokea nchini mwake. 

Mkuu wa sera za kigeni wa Umoja wa Ulaya Josep Borrell amesema katika kikao cha waandishi wa habari baada ya mkutano huo kuwa matumizi ya mashambulizi ya kujilinda dhidi ya maeneo ya kijeshi katika ardhi ya Urusi "ni kitendo halali chini ya sheria za kimataifa wakati inapotumiwa kwa usawa." 

Mkuu wa sera za kigeni wa Umoja wa Ulaya Josep Borrell amesema katika kikao cha waandishi wa habari baada ya mkutano huo kuwa matumizi ya mashambulizi ya kujilinda dhidi ya maeneo ya kijeshi katika ardhi ya Urusi "ni kitendo halali chini ya sheria za kimataifa wakati inapotumiwa kwa usawa." 

Lakini pia ni wazi kuwa ni uamuzi wa binafsi wa kila mwanachama wa umoja wa ulaya. Borrell amesema hakuna anayeweza kumzuia nchi mwanachama kutoa silaha kwa Ukraine na kuwaruhusu Waukraine kuzitumia silaha hizo kuyalenga maeneo ya kijeshi ndani ya Urusi. Lakini pia Umoja wa Ulaya hauwezi kuwalazimisha kufanya hivyo.

Kwingineko, Rais wa Ufaransa Emmanuel Macron anaunga mkono Ukraine kuruhusiwa kutumia silaha za Magharibi kuyashambulia maeneo ya Urusi katika ardhi ya Urusi. Akizungumza baada ya kukutana na Kansela wa Ujerumani Olaf Scholz karibu na mji mkuu Berlin, Macron amesema ni muhimu kuiruhusu Ukraine kuviangamiza vituo vya kijeshi ambavyo vinatumika kufyatua makombora yanayoelekezwa ndani ya Ukraine.
DW