USIMUONE MDOGO! Mdudu huyu anaua watu 3,300 kila mwaka

Watu wengi wanapofikiria viumbe hatari zaidi duniani, mara nyingi akili zao hukimbilia wanyama wakubwa wenye meno marefu kama simba, mamba, au hata papa. Hata hivyo, ripoti za hivi karibuni za kisayansi zinasisitiza kuwa viumbe wadogo zaidi ndio wanaoongoza kwa kuchukua maisha ya watu. Katika orodha hiyo, mdudu ng’e (scorpion) anatajwa kuwa moja ya tishio kubwa la kimya kimya, akisababisha vifo vya takriban binadamu 3,000 hadi 3,300 kila mwaka kote ulimwenguni.

Kwa mujibu wa takwimu kutoka mashirika ya afya, inakadiriwa kuwa zaidi ya watu milioni 1.2 hung'atwa na ng'e kila mwaka. Ingawa idadi kubwa ya waliogongwa hupona kabisa baada ya kupata matibabu, asilimia ndogo hukumbana na sumu kali inayozima mifumo ya miili yao ndani ya saa chache.

Vifo hivi havitokei kwa usawa duniani kote. Maeneo yanayoongoza kwa maafa ni yale yenye hali ya hewa ya joto kali au nchi za kitropiki, zikiwemo sehemu za Amerika ya Kusini (kama Brazil na Mexico), Kaskazini mwa Afrika, Mashariki ya Kati, na India. Maeneo haya yanakabiliwa na changamoto ya mabadiliko ya tabianchi na ukuaji wa miji, hali inayofanya ng'e kuhama kutoka maporini na kuingia kwenye makazi ya watu.

Kati ya spishi zaidi ya 2,500 za ng’e wanaojulikana duniani, ni spishi 30 hadi 40 tu zenye sumu inayoweza kuua binadamu.

Hatari zaidi miongoni mwao ni:

1. Indian Red Scorpion: 
Anapatikana sana India na anatajwa kuwa ndiye ng'e mwenye sumu kali zaidi duniani.

2. Deathstalker: 
Anapatikana kwenye majangwa ya Mashariki ya Kati na Kaskazini mwa Afrika, akisifika kwa kuwa na sumu inayoshambulia haraka mfumo wa neva.

3. Brazilian Yellow Scorpion: 
Huyu ndiye anayesababisha mlipuko wa vifo vingi zaidi kwa sasa nchini Brazil kutokana na kuongezeka kwa mwingiliano wake na binadamu mijini